Psalms 10
Kaem kari memek bare ikup tuok ale ningo ware sangukko ko ngatang den
1O Kari Biya, ni awuk se awar nunguningkiri bagasam a?Ana memek arigisan bare awuk se ni nimi kaluwusam?
2Kari memek alo nunumi patowasan, ale kariimet nungumik mel mena kutuwura guat mu nunga bita maguwusan, ale dagarok te mel ilusan iwitata kawel te nunga betesan.
3Kari memek mu nunga ikia memek ko nunumi patowasan, ale kari mel suen biya ko kaeyawara mu nunup karogo patowasan.
Nuna Kaem nubiring tusan ale balu maguwusan.
4Nuna nusupuling lagara kari alo, Kaem mel yam ko balsan, ale nongota nunga ikia nongomang karo tusan.
5Kari memek alo mu mel suen biya betesan mu terong la aratu saposo. Bare udagi Kaem nuna memek nungarukko mu me ko ikisan.
Nuna nunga kager kari alo gusia den nunga manorsan.
6Ale nongomang ningi la balsan, “Ana sokel ago sanamiwasan, mel bo te dagula me ikisan,” masan, “ikup bo me aringinakkowo,” masan.
7Nuna pempem la kawel duap duap balsan,
ale kari saki nogo ko den memek balsan,
ale kari sang nguangara nungara ko den nunga manorsan.
Nuna tairatela nongomang magara ko den memek balsan.
8Nuna wonong lage due ko yumusan ale baga se, kari munan karowara mu bo taiwuruk se ilumon ale momonko loaga se bagasan.
Ale layen iwita yumusan ale baga se, kari kota numi bataguru taukko me terong bare ilumon momonko kimi bita se bagasan.
Se taiso mu ilusan, ale mosan guratasan ilak nama sapasan.
10Se kari mu yaman ninguru taso ale aniwoso.
Kari memek mu nunga daong kager kilek butata bitagilingisan.
11Ale balsan, “Kaem mel imi me ko balukko pa! Nu koma kaluwuram ale me nanga ariwoso,” masan.
12O Kari Biya, kariimet ikup memek towasan umu nunga iki ale, kari memek alo yaman nungaruko!
13Awuk se kari memek nu Kaem ari pateruk ale nu kota numi baluk, “Kari Biya ani memek me aisukko pa!” ma baluk!
14Bare Kaem, ni kari kilek memek betesan mu ariwasam,
ale kariimet ikup yaman giwasan mu nunga ariwasam tala.
Ale ni nunga sangaruko tom suen biya sinar ago bagasam.
Kari kumik saonga mena mu ni nu sangaruko ka aruso.
Mu awuk, ni kari marmar nungumik nokotam mena, ware nunga saonga bagasam.
15Mu ko ani ka arusam, kari memek nunga nosokel menawurko!
Ale nunga kilek memek beteman mu ko koma ikup yaman ninguru ninguru nungaruko!
16Kari Biya nu tom suen biya ko king.
Se kariimet kaem kawel nunup patawu lagasan, mu noko ali sor te mena namomonko.
17O Kari Biya, ani ikisam, ni kariimet kituwura nunup mena mu nunga aira ikiko,
ale nongomang motam sokel tuiko.
18Ale ni kuriang marmar nunam nonet kuera mu se, kariimet ikup gi se anira, mu nunga niara iki ale nunga sangaruko.
Mutang te kari memek alo mu udagi nguangara me nungarmonkowo.
Copyright information for
WSK